ગીત એક ગાયું
ગીત એક ગાયું ને વાયરે વાવ્યું
કે છોડ એનો છુટ્ટો મેલ્યો રે લોલ!
પંખી એક આવ્યું ને આભ એવું
ફાવ્યું
કે ટહુકો ઉકેલિયો રે લોલ!
ફૂલ એક ફૂટ્યું ને લોચનિયે
ચૂંટ્યું
કે પાંદડી એવી ને એવી રે લોલ!
છલકીને છાઈ રહે વાયરે વેરાઈ
રહે
મીઠી અદીઠ ગંધ સહેવી રે લોલ!
સરવરને તીર સર્યા, સરવરને નીર
તર્યા
અમે કોરા ને છાંયડી ભીની રે લોલ!
તરુવરના તારલા ને આભલાનાં
પાંદડાં
બેઉની વાત એક વીણી રે લોલ!
પ્રિયકાંત મણિયાર
